A Comisión Europea financia a posta en marcha dun observatorio hispano-luso contra a desinformación

A Comisión Europea financia a posta en marcha dun observatorio hispano-luso contra a desinformación, informa o Colexio Profesional de Xornalistas de Galicia.

Un total de 23 entidades españolas e portuguesas, entre as que se atopa a Universidade de Santiago de Compostela, poñen en marcha o proxecto Iberifier, que a Comisión Europea vén de financiar con 1,47 millóns de euros. O observartorio, liderado pola Universidad de Navarra, ten entre os seus obxectivos a detección e desmentido da información no territorio ibérico e o fomento da alfabetización mediática para combatela.


O observatorio Iberifier, un proxecto creado por 23 organizacións españolas e portuguesas para investigar os medios dixitais e monitorizar as ameazas á información e as fake news, vén de ser avalado pola Comisión Europea (CE), que o financiará con 1,47 millóns de euros. Iberifier converterase así nun dos oito ‘hubs’ rexionais que formarán parte do European Digital Media Observatory da CE.

O proxecto de Iberifier está liderado polo investigador Ramón Salaverría da Universidad de Navarra e está integrado por doce centros universitarios, entre os que se atopa a Universidade de Santiago de Compostela, cinco organizacións de verificación e axencias de noticias, e outros seis centros de investigación multidisciplinar. O observatorio centrará o seu labor en cinco liñas de traballo: a investigación sobre as características e tendencias do ecosistema ibérico dos medios dixitais, o desenvolvemento de tecnoloxías computacionais para a detección temperá da desinformación, a verificación e desmentido da desinformación no territorio ibérico, a realización de informes estratéxicos sobre ameazas de desinformación, e a posta en marcha de iniciativas de alfabetización mediática.

Da iniciativa van participar até 70 investigadores, especializados en áreas como a comunicación dixital, as ciencias da computación e datos e o análise estratéxico. Ademais das universidades xa citadas, forman parte de Iberifier o Instituto Universitário de Lisboa - ISCTE, a Universidad de Granada, a Universidad Carlos III de Madrid, a Universitat Politècnica de València, a Universidad Politécnica de Madrid, a Universidad Miguel Hernández de Elche, a Universitat de València, a Universidade de Aveiro, a Fundación Universitaria San Pablo CEU e a Universidad Rey Juan Carlos. Os fact-checkers e axencias de noticias que integran o observatorio son Maldita.es, EFE, Verifica, Verificat, Polígrafo e Lusa. Completan a lista de participantes o Real Instituto Elcano, a Fundación Española para la Ciencia y la Tecnología, o Barcelona Supercomputing Center, o Centro Protocolar de Formação Profissional para Jornalistas, o OberCom e a Associação Literacia Para os Media e Jornalismo.

Ademais de Iberifier, a Comisión Europea recoñeceu outros sete observatorios: o Ireland Hub, da Dublin City University (Irlanda); o EDMO BE/NL, do Stichting Nederlands Institute voor Beeld en Geluid (Países Baixos); o Central European Digital Media Observatory (CEDMO), da Univerzita Karlova (República Checa); o NORDIS, da Aarhus Universitet (Dinamarca), o EDMO BELUCOX, da Vrije Universiteit Brussel (Bélxica); o DE FACTO Observatory of Information, da Fondation Nationale des Sciences Politiques (Francia); e o Italian Digital Media Observatory; da Luiss Libera Università Internazionale degli Studi Sociali Guido Carli (Italia).

No hay comentarios:

Publicar un comentario

Nota: solo los miembros de este blog pueden publicar comentarios.