O deputado Carlos López Font, que presidiu a xuntanza por delegación da presidenta, Carmela Silva, destacou que a provincia de Pontevedra, “que xa é coñecida e recoñecida polo seu prestixio académico e no campo da formación, o coñecemento e a investigación, dá un novo paso adiante”. “Esta decisión que hoxe coñecemos converte a nosa provincia nunha referencia de primeiro nivel dentro do esquema territorial da UNED”, concluíu.
O único punto da orde do día da xuntanza extraordinaria consistía no trámite de audiencia para o nomeamento do novo director, tralo cese da actual directora, María Troncoso, xa publicado no Boletín Interno de Coordinación Informativa (BICI) da UNED o pasado día 23. Deseguido deuse conta de que o nomeamento do profesor González Sánchez será publicado no BICI o próximo luns, con efectos retroactivos a partir de hoxe, 1 de outubro. As novidades foron comunicadas polo vicerreitor de Centros Asociados, Jesús de Andrés. As persoas integrantes da Xunta Reitora quedaron enteradas de que tanto o cese como o nomeamento foron realizados, de acordo coas súas competencias, polo reitor da UNED, Ricardo Mairal. Ademais, confirmouse o traslado da Dirección do Campus Noroeste a Pontevedra, o que reforza o papel deste centro asociado dentro do organigrama da Universidade. Finalmente, a Xunta Reitora fixo constar en acta o agradecemento á anterior directora do centro.
A UNED ten actualmente 5 campus en España. Cada campus dispón de diferentes áreas de coordinación: Académica, orientada á xestión e creación de calendarios de formación regrada; Extensión Universitaria, coa finalidade de coordinar cos centros asociados actividades culturais e formativas non regradas e, por último, a Tecnolóxica, que ten como misión manter e xestionar o equipamento tecnolóxico dos centros para facilitar as clases en rede. As tres coordinacións están baixo a supervisión da Dirección de Campus, que na UNED, ten rango equivalente á Vicerreitoría.
Víctor González, que compatibilizará nas próximas semanas a súa actividade profesional entre Segovia e Pontevedra, desprazarase a continuación a esta cidade e iniciará unha rolda de contactos con tódalas institucións. O profesor González xa tivo no pasado vinculación docente co centro asociado de Pontevedra.
