Ence obtivo perdas netas de 13 M€ no segundo trimestre, polos prezos baixos da celulosa e a enerxía

Os investimentos realizados en 2019 en Navia e Pontevedra contribúen a aumentar as vendas de celulosa nun 19%, reducindo ademais os seus custos de produción

Ence Energía y Celulosa rexistrou unhas perdas netas de 13 millóns € no segundo trimestre do exercicio 2020, como consecuencia dos prezos da celulosa, que se manteñen nos niveis máis baixos rexistrados nos últimos 10 anos, así como dos prezos baixos da enerxía No semestre, a compañía acumula perdas netas por valor de 24,6 millóns €.

Por contra, a produtividade da compañía protagonizou unha importante melloría, grazas á consolidación dos investimentos realizados o pasado ano, o que propiciou un aumento nas vendas tanto en celulosa como enerxía e a unha redución nos custos de produción.

O EBITDA do negocio de Celulosa alcanzou os 8,9 millóns € na primeira metade do ano. Os investimentos realizados o pasado ano nas biofábricas de Pontevedra e Navia (Asturias), que se afianzaron neste primeiro semestre, permitiron aumentar a subministración de celulosa, así como as súas vendas. De feito, as vendas de celulosa melloraron un 19% na primeira metade do ano.

A celulosa que Ence fornece, entre a que cada vez cobran máis peso os produtos diferenciados, ata un 10 % do total, consolídase como unha alternativa sostible e renovable aos produtos derivados do plástico, e como unha gran xeradora de emprego nos sectores loxístico, industrial e forestal. De feito, a actividade das dúas plantas de Ence xeran 11.500 postos de traballo directos, indirectos e inducidos en Galicia e Asturias.

O EBITDA do negocio de Enerxía Renovable mellorou un 24% interanual no segundo trimestre, ata os 15,5 millóns €, e un 5% no conxunto do semestre,, ata os 27 millóns €. A incorporación das dúas novas plantas de biomasa agrícola e forestal de Huelva e Ciudad Real contribuíu ao crecemento do 51% das vendas no segundo trimestre e a compensar o descenso no prezo medio de venda ata os mínimos fixados polo regulador. Neste sentido, as plantas de enerxía renovable de Ence contribúen á descarbonización do sistema eléctrico español, impulsando ao mesmo tempo unha transición enerxética xusta e inclusiva, xerando emprego na denominada “España Baleirada”.

Ence, dentro do impulso ás enerxías renovables, continúa co desenvolvemento de novos proxectos en Andalucía e Castela – A Mancha. Os 405 MW renovables en carteira, con acceso á rede e localizacións aseguradas, atópase á espera da próxima convocatoria de poxas para a implementación do Plan Nacional de Enerxías Renovables, mentres se completa a súa tramitación administrativa, entre o terceiro trimestre de 2021 e o primeiro de 2022.

Ence aposta por unha recuperación verde para superar a crise causada polo coronavirus, apoiada no impulso ás enerxías renovables e na subministración de celulosa, un material renovable, reciclable e de orixe natural, que a compañía produce de maneira sostible e ecoeficiente nas súas biofábricas de Pontevedra e Navia.


Artículo Anterior Artículo Siguiente