Deputación. Silva presume de una campaña turística que superó “con moito todos os obxectivos marcados para todo o ano”

A presidenta da Deputación de Pontevedra, Carmela Silva, deu a coñecer os resultados da campaña de promoción turística “Sigue o teu instinto”, que neste verán xa superou “con moito todos os obxectivos marcados para todo o ano” ao acadar máis de 24 millóns de impactos, cando o obxectivo anual era de 20 millóns”. Silva lembrou que esta campaña de difusión estivo enfocada a tres tipos de canles: Smart TV, redes sociais e medios de comunicación. “Os datos son espectaculares, sinalou, e isto ten que ver cos resultados que acadaron as Rías Baixas nos meses de verán”. 

Amais dos 24 millóns de impactos, en canto ás visualizacións dos vídeos xa se superaron os 5 millóns de visualizacións completas, cando o obxectivo era de 3,4 millóns. No que atinxe a visitas á páxina web e redes sociais, só ás canles da Deputación son arredor de 50.000 pero, tal e como indicou Carmela Silva, tendo en conta tamén as visitas aos artigos promocionados nas revistas de viaxes “xeramos máis de 200.000 en total”. 

En Smart TV acadáronse máis dun millón de visualizacións nos anuncios de vídeos contratados nas plataformas de Atresmedia e Mediaset, o 96% completas. En Youtube superáronse as 1.200.000 impresións cos spots xenéricos, de costa e de patrimonio, o 65% delas completas. En canto á difusión a través das redes sociais, anunciáronse tamén tres spots (xenérico, de costa e patrimonio) en Facebook cunha taxa de visualizacións completas do 90%, 334.000 completas das 369.000 totais, e 1,6 millóns de impresións e 16.000 clics en anuncios dirixidos á web en Facebook e Instagram.

Nos distintos formatos de anuncios de vídeo en medios xeralistas ou non especializados en turismo, obtívose unha porcentaxe de visualizacións completas de entre o 50% (641.000), o 80% (2.036.000) e o 73% (372.000). No que respecta aos banner, producíronse 13,7 millóns de impresións e case 26.000 clics á páxina web. A campaña “Sigue o teu instinto” tamén foi difundida nalgúns dos principais medios de comunicación dixital, “estivemos en todos os periódicos galegos” e tamén noutros como El País, El Mundo, La Nueva España, ABC, La Razón, 20 Minutos, La Vanguardia, Mundo Deportivo, Diario Información, El Periódico, Heraldo, Marca, Telva, Expansión, Cinco Días, El Comidista e Verne. 

Igualmente, tamén se publicaron anuncios en revistas de viaxes online como Viajes National Geographic, que tivo 38.000 páxinas vistas a un artigo sobre o destino, 471.000 impresións dos anuncios na súa web e as súas redes sociais con 7.500 interaccións coas publicacións. Na revista Viajar, os resultados foron de 30.000 páxinas vistas a artigos sobre o noso destino e o Castelo de Soutomaior, e 77.000 impresións en redes sociais con máis de 5.000 interaccións. En canto a Traveler, obtivo 87.000 páxinas vistas a un artigo sobre o noso destino e 815.000 impresións nas redes sociais. E, por último, Elle Living acadou 125.000 impresións dun banner con preto de 200 clics á web.

A presidenta provincial tamén fixo especial fincapé nos datos particulares do mes de agosto, no que se acadaron 18 millóns de impresións coa campaña, máis de 4 millóns de visualizacións completas dos vídeos promocionais, mentres que as publicacións e anuncios tiveron case 80.000 interaccións e clics nas redes e web de Turismo Rías Baixas.