SKA-P
traerá -por fin- ao SonRías Baixas toda a enerxía festiva dos barrios
obreiros co seu inflamable directo e
coas súas cancións, xa convertidas en himnos. A organización do
festival pecha hoxe por todo o alto o cartel musical da súa 18ª edición,
que se celebrará os días 30 e 31 de xullo e 1 de agosto no Recinto da
Estacada de Bueu, con dez novos nomes entre os que
tamén destacan o inxenio e a tenrura do artista urbano total, Rayden; a particular combinación de estilos do malagueño
El Kanka; o rock de acento flamenco de Arco;o enerxético directo de
JazzWoman; a agardada volta dos Alamedadosoulna, despois de case tres anos de silencio; o hip hop tropical do neerlandés de orixe chileno
Maurino; a festa revolucionaria dos cataláns Oques Grasses; o enerxético punk folk galego dos
The Skarnivals; e o dúo de novísimos DJs e produtores lugueses Galician Army.
Estes artistas súmanse ao irresistible cóctel festivo do que xa formaban parte
El Drogas, que fora cantante e baixista de Barricada e un dos máximos representantes do rock español;
o mellor rapeiro en lingua hispana do mundo,
Kase.O; unha das voces máis salientables do underground latinoamericano,
Sara Hebe; o punk-rock dos Desakato, os ritmos do mundo de
García Mc & Nación Quilombo e a paixón pola tradición balcánica de Balkan Paradise Orchestra.
O
SonRías Baixas chega así á súa maioría de idade cunha edición na que
avanzará un paso máis a partir dun modelo xa consolidado, co obxectivo
de chegar a un público máis
amplo, sen perder a esencia dun festival que naceu da paixón polos
festivais do equipo directivo e que os últimos anos ten conquistado o
público de Galicia e do resto do Estado coa súa singular proposta de
música, gastronomía e praia. O pasado agosto, 22.065
persoas puxeron rumbo ao Destino SonRías dende toda a península, para
gozar cunha programación musical de calidade, festiva e reivindicativa,
pero tamén cunha completa proposta de ocio activo, profundamente
integrada no territorio, que xerou na comarca un
impacto superior ao millón de euros, cunha ocupación hoteleira do 100% e
cos establecementos da vila ateigados de festivaleiros e festivaleiras.
O reto, para a organización, é medrar neste ano no que o festival chega
á maioría de idade sen perder de vista
a singulariedade do proxecto.
