“Rosalía”, a primeira obra de teatro sobre a infancia da poeta galega

A infancia de Rosalía de Castro é a protagonista da nova produción de Culturactiva, unha montaxe destinada a público infantil e que recrea a vida da escritora nun dos seus momentos de cambio fundamentais para a súa vida, o traslado desde Padrón a Santiago de Compostela. “Rosalía” adéntrase na infancia dunha nena fantasiosa e rebelde que imaxina o mundo e pon a xogar as palabras. Fina Calleja dirixe un texto de Nate Borrajo, interpretado por Cristina Collazo e Rocío González. “Rosalía” estrearase no vindeiro mes de febreiro e será a primeira montaxe que repara na infancia da máis importante das escritoras galegas. Rosalía ten que deixar a aldea e marchar para Santiago de Compostela. É un cambio difícil para quen disfruta coa vida natural, para unha nena afeita a vivir poñendo a xogar as palabras e inventando mundos e ditos. Rosalía é unha nena e xa está preparada para marchar, ten os baúles preparados, pero ela non está convencida da decisión. Este é o punto de inicio de “Rosalía”, a primeira obra de teatro que ten como protagonista a infancia da principal poeta galega.  A obra ten como vocación rescatar para o público máis novo a infancia da escritora, explicando o seu carácter como unha nena creativa, inconformista, lectora, activa e rebelde ás cousas que considera que non son xustas. Valores que forman parte da obra de Rosalía de Castro e que a rapazada só pode chegar desde a súa explicación adulta. A poesía, a música e a creatividade da nena que será unha das grandes escritoras universais son os argumentos da peza para que os espectadores e as espectadoras novas se acheguen á biografía e Rosalía sen deixar o carácter infantil: xogos de palabras, música popular e o cambio de vida que a protagonista terá que facer como paso dunha etapa a outra da súa vida. Un cambio que na obra ten como reflexo unha grande parte de diversión e outra de transmitir as sensacións da protagonista coas que os rapaces de entre nove e doce anos poden sentirse identificados. Unha equipa feminina Desde a mesmo momento da concepción da obra, a intención é conseguir unha “Rosalía” atractiva para as nenas e nenos e ao mesmo tempo darlles algunhas chaves para ir achegándose á súa vida infantil. Tamén se trata na obra de ver como a influencia da vida cando nena ten na obra da escritora á que as espectadores e espectadores coñecerán no futuro. Para este obxectivo, Culturactiva puxo en marcha unha equipa de traballo completamente feminina, coñecedora da obra de Rosalía de Castro e experta nas montaxes de teatro infantil. O texto da escritora e actriz Nate Borrajo nace do coñecemento de Rosalía de Castro como autora e da maneira en que unha actriz pode sacar adiante ese papel entre a fantasía e a realidade. A directora da obra, Fina Calleja, ten dirixido para Sarabela algunhas das producións fundamentais da compañía ourensá para público novo. O elenco está formado por Cristina Collazo, que asumirá o papel de Rosalía nena e de Rocío González, que asumirá dous papeis, un como amiga de xogos da protagonista e outro como a súa principal coidadora. As dúas actrices teñen unha longa traxectoria na escena galega e tamén no seu audiovisual. DIRECCIÓN. Fina Calleja. Egresada da Real Escola de Arte Dramático e Danza de Madrid e licenciada en Ciencias da Información pola Universidade Complutense. Durante anos combina a actividade escénica con diversos traballos nos medios de comunicación; membro da compañía Sarabela Teatro dende 1998. Dirixe o seu interés cara o mundo da interpretación e as áreas de voz e dramaturxia. Actriz e docente na Aula de Teatro Universitaria de Ourense, asume no marco de SarabelaTeatro as responsabilidades de distribuidora e productora artística. Recibe os premios Maria Casares ao mellor texto adaptado polas versións teatrais de O Lapis do carpinteiro e Sexismunda, galardóns compartidos con Ánxeles Cuña Bóveda e Begoña Muñoz. Interven como actriz en varias series de televisión (Padre Casares entre outras) e crea e dirixe Cristovo e o libro das marabillas ou O último dragón, o último espectáculo infantil de Sarabela Teatro, entre outras. ELENCO. Rocío González. Desde 2002 que comezou a traballar coa compañía A Factoría teatro, Rocío González ten traballado coas principais compañías do país e participado en algúns dos principais proxectos escénicos producidos en Galicia. Ten traballado en numerosas ocasións como integrante de elencos do Centro Dramático Galego, en montaxes como A boa persoa de Sezuán, O regreso ao deserto ou Xardín suspenso, entre outras. Tamén integrou o elenco de As do peixe. Cunha longa experiencia en teatro infantil, algúns dos títulos máis destacados nos que ten participado son Jim e a illa do tesouro, O príncipe e o parrulo, ou Kafka e a boneca viaxeira. No audiovisual participou en series como Luci, Terras de Miranda, Mar libre ou Augasquentes. ELENCO. Cristina Collazo. Actriz para todos os xéneros, ten desenvolvido unha intensa labor nos contacontos, nas actividades de animación teatral e en proxecto teatrais ligados ao Teatro Arte Livre. Entre as súas obras destacan obras como A Gaivota ou O retrato de Dorian Gray. En televisión ten participado en series como O sabor das margaridas, en Pazo de Familia ou en Dalia, a modista. CULTURACTIVA. Desde hai vinte anos, cando comezou o seu traballo escénico, Culturactiva tense convertido nunha das principais produtoras e distribuidoras de eventos escénicos en Galicia, tanto no teatral como no musical. Ademais de ser a distribuidora de artistas tan recoñecidos internacionalmente como Leo Bassi, Jango Edwards ou Yllana e compañías galegas como Baobab Teatro, Píscore ou Isabel Risco no mundo escénico. Como distribuidora musical, Culturactiva traballa con formacións musicais do país de gran prestixio, como son Guadi Galego, Mercedes Peón, Talabarte, Leilía ou O Sonoro Maxín. Na produción teatral, Culturactiva ten estreado espectáculos como Retrincos de Castelao, Sénior, Dous no Camiño, O Valo (coprodución con Pallasos en Rebeldía) ou Falar sen Cancelas.