A Deputación de Pontevedra e o CSIC veñen de abrir o prazo para inscribirse no primeiro curso que se organiza en Galicia sobre “Aplicacións de Fluorescencia de Raios X en Arqueoloxía e Ciencias do Patrimonio”. Trátase dunha pioneira acción de capacitación, que terá lugar os días 21 e 22 de maio, dirixida a profesionais e alumnado de Másters e Doutorados relacionados coa arqueoloxía e o patrimonio cultural, que se enmarca no convenio de colaboración entre ambas institucións para poñer en valor o Centro de Xestión do Coñecemento Arqueolóxico do Pazo de Liñares de Lalín.
No curso, da man de persoas especialistas e cualificadas na materia procedentes da Universidade de Cambridge do Reino Unido, da Universitá degli Studi di Firenze de Italia, das Universidades de Santiago e do País Vaco, así como de centros como “The National Archives” do Reino Unido ou o propio CSIC, revisaranse os fundamentos da técnica e aplicación da Fluorescencia de Raios (FRX) a diferentes tipos de materiais e mostras. Nos últimos anos, a aplicación da FRX na Arqueoloxía e Ciencias do Patrimonio está a acadar un importante desenvolvemento, coa proliferación de instrumentos portátiles que permiten a obtención de datos in situ con rapidez, polo que adquirir formación previa que garanta a calidade dos mesmos é fundamental para as e os profesionais destas áreas.
“Aplicacións de Fluorescencia de Raios X en Arqueoloxía e Ciencias do Patrimonio” comezará o 21 de maio a partir das 9.30 horas e contará con sete seminarios en formato virtual. Ao longo dese día participará Marcos Martinón-Torres, da Universidade de Cambridge; Ignacio Montero, do Instituto de Historia do CSIC; Pilar Prieto e Antonio Martínez, da Universiade de Santiago; Javier Iñáñez, da Universidade do País Vasco; Simona Scrivano do Centro Nacional de Aceleradores de Sevilla; Lucía Pereira do National Archives do Reino Unido e Noemí Silva do CSIC. As e os especialistas afondarán nos mitos e realidades da FRX portátil en arqueoloxía e patrimonio, nas súas aplicacións en arqueometalurxia e cerámica arqueolóxica, nos retos na aplicación da FRX portátil en cerámicas da época moderna, na aplicación da técnica de micro-FRX no estudo de bens culturais, na análise non invasora de materiais pictóricos con espectroscopia de FRX e nas achegas da FRX á arqueoloxía ambiental.
Xa o 22, a partir das 10 da mañá, terá lugar a sesión presencial coa presentación de casos de estudo e dúas sesións prácticas no Pazo de Liñares de Lalín, cumprindo con todos os protocolos covid, e coa participación de Xosé-Lois Armada e Óscar García do CSIC; Olalla López e Zaira García da Universidade de Santiago e Rosarosa Manca da Universitá degli Studi di Firenze en Italia. As expertas e expertos afondarán na FRX no estudo da ourivería dos castros no noroeste ibérico, na análise de esqueletos a través da FRX, na aplicación dos Raios X ao estudo de esmaltes de estaño sobre cerámicas, na protección radiolóxica e nos factores de corrección e interpretación de datos.
As persoas interesadas en asistir ao curso “Aplicacións de Fluorescencia de Raios X en Arqueoloxía e Ciencias do Patrimonio” deberán enviar en primeiro lugar un correo electrónico mariag.faro@incipit.csic.es e seguir, a continuación, os pasos indicados para formalizar a matrícula antes do 18 de maio. Este pioneiro curso, que terá un custe simbólico de 15 €, ten aforo limitado a 20 persoas por razóns prácticas e de prevención ante a covid19.
“Aplicacións de Fluorescencia de Raios X en Arqueoloxía e Ciencias do Patrimonio” forma parte das actividades que a Deputación e o CSIC, a través do INCIPIT (Instituto de Ciencias do Patrimonio) están a organizar no marco do convenio de colaboración entre ambas institucións. A través deste acordo tamén se están a investigar as contornas e interior dos castros de Bendoiro (Lalín), Castrolandín (Cuntis) e Montaz (Silleda) e desenvolvéronse conferencias dirixidas á comunidade escolar sobre os castros e os seus habitantes, as paisaxes do pasado ou arqueoloxía sen escavar a terra. Amais, no marco do convenio, están previstas xornadas de portas abertas no Centro de Xestión Arqueolóxica do Pazo de Liñares onde, amais de coñecer o laboratorio e os procesos de traballo que alí se desenvolven, as persoas visitantes poderán ver os materiais investigados.
0 Comentarios