O Tribunal Superior de Xustiza de Galicia admite a trámite o recurso do PP de Poio contra a subida de impostos do Tripartito

O portavoz do PP de Poio, Ángel Moldes, explicou este sábado que a sala cuarta do Tribunal Superior de Xustiza de Galicia (TSXG) admitiu a trámite o recurso interposto polos populares contra a subida de impostos aprobada en decembro polo Tripartito.

Moldes destacou que, ao emprender accións xudiciais, que o PP “cumpriu a súa palabra e o seu compromiso de esgotar todas as vías” para impedir a entrada en vigor dunha subida “inxusta e ilegal”, como a aprobada en decembro por BNG, PSOE e Avante Poio.

O voceiro do PP subliñou que, despois de intentar impedir a subida por todas as vías políticas e administrativas, e ante unha evidente indignación cidadá, como demostrou a manifestación con vehículos que percorreu o Concello en xaneiro, chegou o momento de que se pronuncie a xustiza.

Para os populares, a modificación da ordenanza aprobada polo Tripartito subindo o IBI a segundas residencias e vivendas teoricamente desocupadas “non se axusta á legalidade” como demostra diversa xurisprudencia en Galicia e noutras comunidades autónomas onde xa se anularon estas subidas.

“O Tripartito quere subirlle un 25% no IBI a moitas familias co único criterio de que non estea ninguén censado nunha vivenda, a sabendas de que isto vai prexudicar a veciños que compraron ou herdaron unha casa”, explicou Moldes. “BNG, PSOE e Avante queren facer pagar máis a autónomos, traballadores, mariñeiros... que aforraron e invertiron con moito esforzo e traballo ou que a herdaron de seus pais. Queren facerlles pagar máis a sabendas de que non só é inxusto, é Ilegal”.

Moldes destacou que o único culpable de que este asunto remate nos tribunais é o Tripartito, “que está tan obsesionado con cobrarlle máis á xente e con ingresar máis a toda costa que é capaz de pasar por riba da legalidade”.

“Seguiremos defendendo aos veciños do afán recaudatorio dun Tripartito que, no peor momento, en medio dunha pandemia, en vez de axudar ás familias lles sube os impostos”, destacou Moldes: “O noso compromiso é claro e non é outro que evitar a subida do 25% a vivendas baleiras. O PP aposta por baixar impostos o tripartito por cobrarlle máis aos veciños, mesmo sen respectar a lei”.

No hay comentarios:

Publicar un comentario

Nota: solo los miembros de este blog pueden publicar comentarios.