Así, a conselleira de Medio Ambiente, Territorio e Vivenda, Ángeles Vázquez, xunto co conselleiro de Medio Rural e Cohesión Territorial do Principado de Asturias, Alejandro Calvo, o conselleiro cántabro de Gandería e Medio Ambiente, Guillermo Blanco, e o conselleiro de Fomento e Medio Ambiente de Castela e León, Juan Carlos Suárez-Quiñones, manterán mañá un encontro por videoconferencia con representantes das organizacións agrarias nacionais.
Á xuntanza están convocadas a Asociación Agraria de Mozos Agricultores (ASAJA), a Unión de Gandeiros e Agricultores Montañeses (UGAM-COAG) e a Unión de Pequenos Agricultores e Gandeiros (UPA), cos que conversarán sobre as medidas e iniciativas impulsadas polos catro gobernos rexionais para solicitar á ministra Teresa Ribera unha reunión para replantexar a súa pretensión de incluír esta especie silvestre no Lesrpe.
As rexións ao norte do río Douro defenden que son estas administracións as que deben liderar a estratexia nacional para a conservación do lobo Ibérico, por dúas razóns básicas: os gobernos autonómicos son os que contan con información e coñecementos necesarios para controlar de maneira adecuada a especie; ao que se suma o feito de que estas catro rexións tamén acumulan á maioría de exemplares que existen en España.
De feito, esta mesma mañá a conselleira de Medio Ambiente recordou -durante unha visita a unha explotación gandeira na Pastoriza- que Galicia, Asturias, Cantabria e Castela e León están a articular medidas conxuntas e coordinadas para trasladar a súa oposición a esta inclusión que pretende materializar o Goberno do Estado e que non suporía garantir o necesario equilibrio entre a poboación do lobo e as explotacións gandeiras.
