“Ence é hoxe máis forte e resiliente”, afirma o Presidente da compañía na Xunta Xeral de Accionistas

A Xunta Xeral de Ence – Energía y Celulosa aprobou as contas anuais do exercicio 2020 nunha sesión celebrada telemáticamente, debido á situación de crise sanitaria e o actual estado de alarma.
O Presidente de Ence, Ignacio Colmenares, sinalou na súa intervención que 2020 foi un ano complicado do que, con todo, a compañía saíu reforzada, grazas á prudencia coa que se encarou a pandemia. “Ence é hoxe máis forte e resiliente”, afirmou.

No negocio de Celulosa, 2020 estivo marcado por uns prezos no mercado excepcionalmente baixos, que lastraron o resultado do exercicio. Unha tendencia que se reverteu desde principios de 2021, coa recuperación do prezo da celulosa neste ano.

No negocio de Enerxía, as perspectivas son moi positivas. En 2020 Ence puxo en funcionamento dúas plantas de xeración renovable con biomasa en Puertollano e Huelva, aumentando a capacidade instalada nas plantas independentes de xeración máis dun 30% fronte a 2019. Para continuar crecendo en renovables, Ence conta cunha carteira de proxectos maduros de preto de 500 MW, que estará lista para empezar a construírse a finais de 2021. Isto supoñerá multiplicar por 2,5 veces a capacidade instalada actual.
“Os nosos dous negocios están plenamente aliñados coa Recuperación Verde, promovida desde a Comisión Europea. Aproveitando estas vantaxes, e impulsados polo esforzo e o bo traballo realizado en 2020, seremos capaces de avanzar en 2021, con mellorías que se deixarán sentir de forma clara nos nosos resultados”, indicou Ignacio Colmenares.

No ámbito corporativo, en 2020 o grupo pechou con éxito dúas operacións estratéxicas que permitiron reducir o endebedamento da compañía en 335 M€ neste exercicio: a venda do 49% do capital de Ence Enerxía ao fondo de investimento en infraestruturas Ancala Partners e a venda dunha participación do 90% na planta termosolar de Puertollano a Q- Energy.

A compañía analiza desde a prudencia a realización de novos investimentos e prevé centrarse en seguir mellorando en eficiencia, competitividade e sustentabilidade, así como en apontoar o seu crecemento orgánico en Enerxía, apostando pola súa pipe line.

En relación á biofábrica de Pontevedra, o Presidente de Ence afirmou que a compañía continuará defendendo a continuidade da súa concesión. Trátase, indicou, dunha planta completamente segura e cuxos parámetros ambientais melloran amplamente as máis esixentes normas e autorizacións ambientais, europeas e españolas, da man dos investimentos acometidos nos últimos anos.

Finalmente, a Xunta Xeral de Accionistas de Ence tamén aprobou, a proposta do Consello de Administración, a reelección de Rosa María García Piñeiro como conselleira independente; o nomeamento de Javier, Óscar e Gorka Arregui Abendivar como conselleiros dominicais; a ratificación do nomeamento como conselleiro dominical de Ignacio Comenge Sánchez-Real; o nomeamento dunha conselleira independente, María da Paz Robina Rosat; e a fixación do número de membros do Consello de Administración en trece.

No hay comentarios:

Publicar un comentario

Nota: solo los miembros de este blog pueden publicar comentarios.