Acto en O Morrazo : "a Lei de Cambio Climático pon en risco a continuidade das concesións da industria terra-mar"

 O PP alerta de que a Lei de Cambio Climático pon en risco a continuidade das concesións da industria terra-mar

  • Critican que altera a duración das concesións e deixa a porta aberta a que sexa un órgano consultivo quen outorgue ou denegue as prórrogas con total discrecionalidade.
  • “Están poñendo contra as cordas miles de postos de traballo dun sector que demostrou ser punteiro nos últimos anos”.

Deputados provinciais do Partido Popular de Pontevedra, xunto a concelleiros do PP de Bueu, Cangas e  Morrazo, denunciaron esta mañá que a Lei de Cambio Climático que o Goberno central está tramitando no Congreso pon en risco a continuidade de todo o sector mar-industria da provincia e, polo tanto, tamén do Morrazo, xa que non só altera a duración das concesións, senón que tamén deixa a porta aberta a que sexa un órgano consultivo quen outorgue ou denegue as prórrogas con total discrecionalidade.


Así o explicou o voceiro do grupo provincial, Jorge Cubela, que anunciou unha “ofensiva política en defensa da cadena mar-industria, que se está vendo afectada por unha Lei que é unha desfeita para os sectores económicos, feita en contra dos intereses de Galicia. Si hai un territorio que se vai ver afectado pola aprobación desta Lei é o Morrazo e toda a provincia de Pontevedra”. Nesta liña, sinalou que vai supoñer o peche de conserveiras, depuradoras, piscifactorías, cocedeiros.... “En definitiva, todas aquelas instalacións que teñen algún tipo de concesión no terreo de dominio público marítimo terrestre”.


Cubela pediu “que se defenda a estes sectores na provincia”, e por iso anunciou que o PP defenderá unha moción no pleno da Deputación de Pontevedra pedindo que se retiren os puntos 3 e 4 do artigo 18 da Lei de Cambio Climático, e que se defendan os postos de traballo e a permanencia de moitas empresas que nestes momentos están abocadas ao peche. “Están poñendo contra as cordas miles de postos de traballo dun sector que demostrou ser punteiro nos últimos anos”, dixo.


Nesta liña tamén se pronunciou a deputada e voceira do PP de Bueu Elena Estévez, que amosou o “apoio incondicional” dos populares a todo o sector. “Non é momento para experimentos nin inventos. Coa situación tan complicada que se está vivindo, sumarlle este despropósito pode supoñer para a nosa comarca unha paralización, unha perda de postos de traballo moi importante”, alerta. Por iso, pediu que “entre todos estamos a tempo de esixir ao Goberno central que reconsidere este posicionamento. Hai que saber conxugar a defensa do medio ambiente co mantemento dun dos sectores máis importantes para a nosa provincia”.


Por último, a senadora Pilar Rojo recordou que “o mar é un dos piares do noso desenvolvemento económico e por iso non entendemos o empeño do Goberno de Pedro Sánchez para non cambiar o artigo dunha lei que pon en risco toda a nosa economía e todo o sector”. Así, subliñou que este artigo pon en risco a continuidade de 4.000 empresas de toda Galicia, supón perdas económicas de 10.000 millóns de euros e a perda de 40.000 empregos. “Un novo ataque ás familias galegas cunha modificación inxusta e que demostra que o Goberno socialista non entende a nosa forma de vida. Nós somos os primeiros que queremos defender a nosa costa, porque é parte intrínseca da nosa forma de vida”. 



No hay comentarios:

Publicar un comentario

Nota: solo los miembros de este blog pueden publicar comentarios.