"Querer o Comercio local do Morrazo ten premio"


Fecimo aposta no mes de febreiro por unha campaña de dinamización comercial baseada no emprego das tarxetas de fidelización do Comercio do Morrazo.

A Federación de Comerciantes e Industriais do Morrazo – FECIMO – acaba de pór en marcha onte, 1 de febreiro de 2021, unha campaña de dinamización comercial para todo o mes dos namorados. 

Esta campaña está baseada na promoción das tarxetas de fidelización do Comercio do Morrazo, unhas tarxetas que xa saíron ao público no mes de decembro para as localidades de Cangas, Moaña e Bueu. 
Este ano, debido á actual situación provocada pola pandemia e trala boa acollida por parte dos establecementos e dos clientes da tarxeta, dende Fecimo, quíxose aproveitar para desenvolver un sistema de participación que minimizase o contacto e simplificase a participación dos clientes nesta campaña. Desta forma, cando un cliente empregue a súa tarxeta de fidelización, durante as datas da campaña (dende o 1 ata o 28 de febreiro), para obter unha porcentaxe de bonificación nas súas compras ou consumicións en calquera dos comercios ou locais que teñan activo o sistema da tarxeta, entrará no sorteo final da campaña. Unha vez se remate coa campaña (despois do 28 de febreiro), terá lugar o sorteo onde se repartirán 900€ en premios, 300€ por localidade, entre as compras realizadas nos establecementos do Morrazo rexistradas nas tarxetas de fidelización, e entregaranse aos clientes gañadores en forma de tarxetas regalo para gastar no comercio local adherido á iniciativa. 

Cabe destacar que nesta campaña, aqueles clientes que non resulten gañadores, benefícianse igualmente ao poder acumular saldo coas bonificacións que obteñen directamente con cada compra ao empregar a tarxeta. Actualmente xa son 110 os locais da comarca que participan no sistema das tarxetas e polo tanto desta campaña. Os clientes que aínda non posúan a súa tarxeta, poderán obtela de forma física neses mesmos locais ou ben na oficina de Fecimo, mentres que se a prefiren de forma dixital, poderán facelo a través da web comerciodomorrazo.com ou da APP oficial de Comercio do Morrazo. 

Para saber cales son os locais de Moaña, Cangas e Bueu que participan na campaña e teñen a tarxeta, poderase visitar a web de Comercio do Morrazo e filtrar na sección “Comercios” o apartado “tarxeta de fidelización”. Aínda que a campaña estea vixente ata o 28 de febreiro, o sistema das tarxetas non teñen data de caducidade, polo que poderanse seguir empregando para acumular e descontar saldo nos comercios que sigan activos no programa.



No hay comentarios:

Publicar un comentario

Nota: solo los miembros de este blog pueden publicar comentarios.