"RIAS BAIXAS TRIBUNA" es una web que funciona sin ánimo de lucro alguno. Es de agradecer el interés que muestras por esta opción...
O SEFF acolle mañá a premiere da película que, antes da súa chegada ás salas de cinema, fará tamén parada este mes de novembro en Cineuropa, Márgenes e na Culturgal.
Coincidindo coa primeira proxección pública en
Galicia do filme, Alfonso Zarauza recibirá o
próximo domingo 22 o Premio Cineuropa no acto de
clausura do festival.
Mañá xoves o Festival
de Cine Europeo de Sevilla (SEFF) acollerá a
estrea mundial de Ons, a
quinta longametraxe do cineasta Alfonso Zarauza.
A sección Historias Extraordinarias - Special
Screen, na que se enmarca a proxección do
filme, é unha das grandes novidades da 17ª edición
do Festival de Sevilla. Nela participan catorce
títulos de países como Reino Unido, Bélxica,
Francia, Irlanda ou Dinamarca que destacan pola súa
vontade de chegar ao gran público e por combinaren
narrativas íntimas e precisas con historias humanas
e personaxes que deixan pegada.
Antes da súa chegada ás salas de cinema, o filme
continuará co seu percorrido por festivais como Cineuropa
(o 22 de novembro, no que o director recollerá tamén
un dos premios honoríficos desta edición) ou Márgenes
(cunha proxección o 28 de novembro na Cineteca
de Madrid). Alén disto, o próximo 27 de novembro a Culturgal
tamén contará na súa programación cun evento
especial no que, antes da súa proxección,
integrantes do equipo presentarán o filme e se
contará coa música en directo de Chicharrón.
O trío de Carballo achega á banda sonora de
Ons o tema “Na cela”, que adapta un poema de
Antía Otero, e prevé acompañar o filme nalgunhas das
presentacións previstas de cara á estrea en salas
comerciais.
Zarauza presenta neste drama con toques de misterio
a un matrimonio en crise (Melania Cruz e Antonio
Durán ‘Morris’) que trata de salvar a súa
relación vivindo unha temporada na illa de Ons. Unha
vez alí, o seu destino cruza co dunha muller
amnésica que aparece naufragada na praia. Completan
o reparto Xúlio Abonjo, Marta Lado, Anaël Snoek,
Miguel de Lira, Diego Anido, Montse Martínez e
Cris Iglesias.
Ons, o filme
Ons é a quinta longametraxe de Alfonso
Zarauza, un dos cineastas galegos máis sólidos e
experimentados, tras A noite que deixou de
chover (2008), Encallados (2013),
Os fenómenos (2014) e A
viaxe dos Chévere (2014). O director
presenta con este traballo un filme de madurez,
intimista e cunha profunda mirada autoral,
escollendo a paisaxe agreste de Ons como escenario
da intemperie emocional dos seus protagonistas.
A película foi rodada por enteiro na illa de Ons no
outono de 2019 e conta cun equipo artístico e
técnico 100% galego liderado por Alfonso Zarauza
-que ademais asina o guion canda Jaione Camborda-
con talentos coma o de Alberte Branco na
dirección de fotografía, Elia Robles na
dirección de arte, Sérgio Silva e David
Machado na dirección de son ou Xavi Font
na produción executiva. A banda sonora contén temas
dos grupos Chicharrón e Leilía.
Ons está coproducida por Maruxiña Film Company
(Galicia) e Bando à Parte (Portugal) e conta
coa participación da Televisión de Galicia
(TVG) e da Rádio e Televisão de Portugal
(RTP), con subvención de Agadic e coa
colaboración da Deputación de Pontevedra.
0 Comentarios