Melania Cruz recibirá o Premio Cinema Galego do FICBUEU nun encontro co público

Manuel Manquiña protagonizará o monólogo desta 13ª edición do festival e o crítico Javier Tolentino presentará o seu último libro


A actriz lucense Melania Cruz recibirá o Premio Cinema Galego do FICBUEU 2020 nun encontro co público que terá lugar na xornada de clausura. Outros recoñecidos persoeiros do mundo do cinema, como o actor Manuel Manquiña ou o crítico Javier Tolentino, participarán nas actividades programadas dentro do 13º Festival Internacional de Curtametraxes de Bueu, que se desenvolverá do 11 ao 19 de setembro coas limitacións de aforo e demais medidas de seguridade que require a prevención fronte ao coroavirus.


O Encontro con Melania Cruz celebrarase o sábado día 19 na sala multiusos do Centro Social do Mar, con entrada de balde. As e os asistentes poderán achegarse á traxectoria vital e profesional desta actriz, gañadora de dous premios Mestre Mateo e un María Casares. Melania Cruz ten pendente de estrea o filme ‘Ons’ e tamén protagonizou a galardoada ‘Dhogs’, ademais de participar en destacados proxectos do cine galego dos últimos tempos, como ‘María Solinha’, ‘A esmorga’, ‘Arima’ ou ‘Trote’. No entanto, segue facendo teatro e vímola en series galegas como ‘A estiba’, ‘Serramoura’ ou ‘Contou Rosalía’, na que interpretaba á ilustre poeta.


O humor vén sendo unha constante nas últimas edicións do FICBUEU e este ano o monólogo correrá a cargo dun dos seus máximos expoñentes en Galicia, Manuel Manquiña. Con máis de trinta películas ás costas, o actor vigués fíxose coñecido a nivel estatal pola súa participación en ‘Torrente’ e ‘Airbag’, filme que lle valeu unha nominación aos Goya. Puidemos velo asemade no teatro, en programas de televisión e en series da TVG, como a aplaudida ‘Era visto!’. O 11 de setembro, a partir das 22 horas, estará no auditorio do Centro Social do Mar para compartir as súas reflexións en ton de comedia co público, que deberá adquirir previamente unha entrada. 


Outro dos sinais de identidade do Festival Internacional de Curtametraxes de Bueu viñan sendo os programas de radio en directo, unha das actividades que este ano quedou cancelada por mor da Covid-19. Porén, si contaremos coa participación dun dos críticos radiofónicos máis relevantes do panorama estatal, Javier Tolentino, que nos presentará o seu último libro, ‘Un alfabeto para Emma Suárez’, a través dunha conversa dinamizada pola actriz canguesa Mónica Camaño. O acto está organizado en colaboración con Librería Miranda e terá lugar o martes 15 ás 20 horas na sala multiusos do Centro Social do Mar, con acceso gratuíto. 


MELANIA CRUZ

Artículo Anterior Artículo Siguiente